समाचार

नेपाली क्रान्तिको मोडेल कुनै किताबमा भेटिँदैन ः प्रचण्ड


काठमाडौं, ११ माघ
पूर्वप्रधानमन्त्री एवं नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले नेपाली क्रान्तिको मोडेल संसारको कुनै पनि किताबमा नभेटिने बताएका छन् ।
गोपीरमण उपाध्याय र मनहरि तिमिल्सिनाद्वारा सम्पादित पुस्तक ‘जनताको जनवादका आधारहरू’ नामक पुस्तक बिमोचन कार्यक्रममा प्रचण्डले नेपालको जनवादी क्रान्ति विश्व इतिहासमै मौलिक भएको बताएका हुन् ।
कार्यक्रममा अध्यक्ष प्रचण्डले भने, ‘विश्व इतिहासमा पूँजीवादी क्रान्तिको नेतृत्व कम्युनिष्टहरुले गर्ने गरेका छन्। तर, नेपालले त्योभन्दा मौलिक मोडेलको विकास ग¥यो। हाम्रो क्रान्तिमा पूँजीपति वर्गलाई पनि साथ लियौं। यो मोडेल संसारको कुनै पनि किताबमा खोजेर भेटिँदैन ।’
प्रचण्डले कम्युनिष्ट आन्दोलन सामन्तवाद, साम्राज्यवादविरोधी आन्दोलन भएको बताए । उनले भने, ‘कम्युनिष्ट आन्दोलन सामन्तवाद, साम्राज्यवादविरोधी आन्दोलन हो । सामन्तवाद र वैदेशिक हस्तक्षेपका विरुद्ध संघर्ष गरेर नै माओत्सेतुङले चीनमा जनवादी क्रान्ति सम्पन्न गर्नुभयो। क्रान्तिको नेतृत्व सर्वहारा वर्गको हातमा आयो। तर, हिन्दूस्तानको आन्दोलन त्यसो हुन सकेन ।’
‘हिन्दूस्तानको कम्युनिष्ट आन्दोलनले सफलता प्राप्त गर्न नसक्नुमा साम्राज्यवादसँग नरम नीति लिनु पनि थियो’ प्रचण्डले भने, ‘त्यहाँको कम्युनिष्ट पार्टीले साम्राज्यवादसँग संघर्ष गर्न सकेन । बरु, उल्टै साम्राज्यवादसँग सहकार्यको नीति लियो । त्यसको फाइदा डेमोक्र्याट्सहरुले उठाए । त्यसमा चीन र रुसका कम्युनिष्ट नेताहरुको सल्लाह पनि जिम्मेवार छ । त्यसकारण हिन्दूस्तानको कम्युनिष्ट आन्दोलन सोचेअनुसार अघि बढ्न सकेन। त्यसबाट हामीले गम्भीर शिक्षा लिएका छौं ।’
प्रचण्डले जनताको जनवाद नेकपाको संक्रमणकालीन कार्यदिशा भएको बताए । उनले भने, ‘हामीले जनताको जनवादलाई संक्रमणकालीन कार्यदिशाका रुपमा अंगीकार गरेका छौं । समाजवादी क्रान्तिको तयारीका लागि यो एउटा बाटो हो । महाधिवेशनसम्म जाँदा हामी व्यापक अन्तरक्रिया र बहसको प्रक्रियामा जान्छौं। समाजवादी क्रान्तिको कार्यदिशा थप परिमार्जनसहित संश्लेषण गर्छौं ।’
‘जनताको जनवादका आधारहरु’ पुस्तकमाथि टिप्पणी गर्दै नेकपाका स्थायी समिति सदस्य युवराज ज्ञवालीले कम्युनिष्ट आन्दोलन स्वतन्त्रताको आन्दोलन भएको बताए । पुस्तकमाथि टिप्पणी गर्दै उनले भने, ‘गोपीरमण उपाध्याय र मनहरि तिमिल्सिनाद्वारा सम्पादित पुस्तक अत्यन्तै उपयोगी छ । यसले नेपालको कम्युनिष्ट आन्दोलनको विकासक्रम बुझ्न सहयोग मिल्नेछ ।’
नेता ज्ञवालीले जनताको जनवादको कार्यदिशाले पूँजीवादलाई सुदृढ नगर्ने बताए । उनले भने, ‘जनताको जनवाद पूँजीवादलाई सुदृढ गर्ने कार्यक्रम होइन । यसले पूँजीवादी क्रान्तिका उपलब्धिसँगै समाजवादी क्रान्तिको पनि तयारी गर्ने मान्यता बोक्दछ । कसैले जनताको जनवाद भनेको पूँजीवादको सुदृढीकरण गर्छ भन्यो भने त्यो गलत हुन्छ । हाम्रो कार्यदिशा समाजवादको कार्यदिशा हो, यसमा भ्रमित हुनु हुँदैन ।’
ज्ञवालीले दलाल नोकरशाही पूँजीवादमाथि विजय हासिल नगरी समाजवादमा पुग्न नसकिने बताए । उनले भने, ‘समाजवादी क्रान्तिको मुख्य बाधक दलाल नोकरशाही पूँजीवाद हो । त्यसलाई परास्त नगरी समाजवादी क्रान्ति सम्भव हुँदैन। दलाल पूँजीवादले सत्ताको संरक्षण खोज्छ, त्यसमा कम्युनिष्ट पार्टी सचेत हुनुपर्छ । हामीकहाँ वामपन्थी सरकारले नै दलाल पूँजीवादको संरक्षण गरिरहेको छ । यसमाथि समीक्षा गरिनुपर्छ ।’
कार्यक्रममा पुस्तकका सम्पादकद्वय गोपीरमण उपाध्याय र मनहरि तिमिल्सिनाले नेकपाले संश्लेषण गरेको वैचारिक कार्यदिशाको बुझाइमा एकरुपता कायम गर्न पुस्तक सहयोगी हुने बताए । पुस्तक इण्डिको इन्क प्रकाशनले बजारमा ल्याएको हो ।
नेकपाको पहिलो पर्चादेखि एमाले¬–माओवादी एकतासम्म
पुस्तकमा नेकपाको स्थापनादेखि एकीकृतको अवस्था, कम्युनिष्ट आन्दोलनको विभाजनपछि विभिन्न समूहहुँदै पूर्वएमाले र पूर्वमाओवादीको धाराको विकासका ऐतिहासिक निर्णय र त्यसको दस्तावेजीकरण एवं पार्टी एकता प्रक्रियापछि नेकपाले गरेका निर्णय लिपिबद्ध गरिएको छ ।
मुख्यतः ४ खण्डमा रहेको पुस्तकको पहिलो खण्डमा नेपाल कम्युनिष्ट पार्टीको पहिलो पर्चा, २०१५ सालको आम निर्वाचनमा नेकपाद्वारा जारी चुनावी घोषणापत्र, २०१७ सालको फैजी ‘कू’ पछि नेकपाले जनताका नाममा गरेको अपिललगायत विषय समेटिएको छ ।
दोस्रो खण्डमा झापा विद्रोहदेखि नेकपा (एमाले)को गठन, मदन भण्डारीको जनताको बहुदलीय जनवादको पृष्ठभूमि, त्यसको संश्लेषण एवं विकास प्रक्रियासँग सम्बन्धित दस्तावेजका मुल अंश समावेश गरिएको छ । तेस्रो खण्डमा सेक्टर काण्डदेखि माओवादबारे संश्लेषण, जनयुद्धको तयारी, विकास हुँदै २१औँ शताब्दीमा जनवादको विकास, १२ बुँदे समझदारी, शान्ति सम्झौता, हेटौँडा महाधिवेदनमा संश्लेषण गरिएको समाजवादी क्रान्तिको कार्यदिशालगायत दस्तावेजन समेटिएको छ ।
यसैगरी चौथो खण्डमा तत्कालीन नेकपा (एमाले) र नेकपा (माओवादी केन्द्र)को चुनावी गठबन्धनदेखि पार्टी एकताको घोषणा, पार्टीका राजनीतिक प्रतिवेदनलगायत विषय समावेश गरिएको छ । नेकपाको समाजवादउन्मुख जनताको जनवादको वैचारिक आधार एवं अन्तर्वस्तु र नेकपाको ७० वर्षको इतिहास बुझ्न पुस्तकले सहयोग पु¥याउने सम्पादक तिमिल्सिनाले जानकारी दिए ।

Leave a Reply

avatar
  Subscribe  
Notify of

Comment here