समाचार

हिमपहिरोमा बेपत्ता ७ जनाको खोजीमा कठिनाइ

पोखरा, ६ माघ
अन्नपूर्ण पदयात्राको क्रममा हिमपहिरोमा बेपत्ता भएका ४ कोरियन र ३ नेपाली नागरिकलाई हालसम्म फेला पर्न सकिएको छैन । पदयात्रा क्षेत्रको हिमालयनबाट माथि देउरालीको बीच करिब तीन हजार २०० मिटर उचाइमा अवस्थित हिङ्कुकेभ वरिपरि गत माघ ३ गते बिहान १० बजेको आएकोे हिमपहिरोमा परी उनीहरू सम्पर्कविहीन हुन पुगेका थिए ।
घटनामा केही विदेशी पर्यटक तथा नेपाली उम्किन सफल भएका थिए । नेपाली पथप्रदर्शक सरोज परियार,सहयोगी मीनबहादुर लामा(तामाङ) र छिरिङ भोटे तथा कोरियन नागरिक लि मिन सु, जोङ्गपिल बोङ्ग, किम सोक जा र चोइ जो वोनको अवस्था हालसम्म अज्ञात रहेको जनाइएको छ ।
टेकिङ्ग एजेन्सीज् एशोसिएशन) अफ नेपाल(टान) पश्चिमाञ्चल संघ पोखराले पत्रकार सम्मेलन आयोजना गरी हराइरहेका पर्यटकको खोजी कार्यमा प्रतिकूल मौसमका कारणले कठिनाइ भएको जनाएको छ ।
घटनास्थलमा बाक्लो हिउँ जमेको तथा अहिले पनि हिउँ पर्ने क्रम नरोकिएकाले बेपत्ता भएकाको अवस्था हालसम्म पनि यकिन हुन नसकेको टानका अध्यक्ष हरि भुजेलले जानकारी दिए । घटनास्थल भौगोलिकरुपमा अत्यन्त विकट रहेको तथा सञ्चार, सडकलगायतका कुनै पनि पूर्वाधार नभएकाले समेत खोजी कार्यमा अप्ठ्यारो भएको बताइन्छ ।
शनिबार हिमपहिरोमा परी घाइते भएका १ जना चिनियाँ नागरिक ज्वाङ यिङ र उहँका पदयात्रा सहयोगी जगदिश खत्रीलाई उद्धार गरी पोखरास्थित फेवासिटी अस्पतालमा उपचार भइरहेको उनले जानकारी दिए ।
पदयात्रामार्गको दोभानभन्दा माथि तथा माछापुच्छ«े आधार शिविर, देउरालीलगायतका स्थानबाट १ सय ३० पर्यटक तथा नेपाली नागरिकलाई स्थानीयवासी, जनप्रतिनिधिलगायतको सहयोगमा हेलिकप्टरबाट उद्धार गरिएकोमा ६४ लाई पोखरा तथा अन्यलाई छोम्रोङसम्म ल्याइएको टानले जनाएको छ । घटनापछि अन्नपूर्ण पदयात्रा मार्गमा अहिले कोही पनि पर्यटक नरहेको बताइन्छ ।
टानले घटनालगत्तै सातको उद्धार टोली घटनास्थलतर्फ पठाएको थियो । सो टोलीले त्यहाँको स्थलगत अवलोकन गर्दा पर्यटक हराएको आशङ्का गरिएको स्थलमा बाक्लो हिउँ जमेका कारणले हिउँ पग्लन कम्तीमा पनि १ महिना समय लाग्ने र खोजीमा कठिनाइ भएको जनाएको छ । घटनास्थल वरपर अहिले पनि हिउँ पर्ने क्रम जारी रहेको बताइन्छ ।
हराइरहेका आफन्तसमेत घटनास्थलतर्फ गएको टानका निर्वतमान अध्यक्ष एवं उद्धार टोलीका संयोजक दीपकराज अधिकारीले जानकारी दिए । त्यसैगरी कोरियनका आफन्तको टोलीसमेत आइतबार पैदलयात्रामार्फत घटनास्थलतर्फ लागेको छ ।
४ चिनियाँ पर्यटक सम्पर्कमा
यसैबीच थ्रोङला पार गर्ने क्रममा मनाङबाट सम्पर्कविहीन भएका चार चिनियाँ पर्यटक आइतबार सम्पर्कमा आएका छन् । ती पर्यटक थ्रोङला पार गरेर मुस्ताङ आइपुगेको पर्यटन प्रहरी कार्यालय पोखराका प्रहरी सहायक निरीक्षक टीकाराम पौडेलले जानकारी दिए ।
मनाङको निस्याङ गाउँपालिका–९ मा रहेको अन्नपूर्ण संरक्षण क्षेत्र आयोजनाको चेकपोष्टमा गत पुस २७ गते थ्रोङ्ला पासका लागि अनुमति लिएका उहाँहरू सम्पर्कमा नआएपछि प्रहरीले अनुसन्धान शुरु गरेको थियो ।
मन्त्रालयको ध्यानाकर्षण
यसैबीच गण्डकी प्रदेशको उद्योग, पर्यटन तथा वातावरण मन्त्रालयले हिमपहिरोमा परी हराएका ४ कोरियाली र ३ नेपाली गरी ७ जना पर्यटक सम्पर्कविहीन भएको घटनाप्रति हाम्रो ध्यानाकषर्ण भएको जनाएको छ । उक्त स्थानमा हराएका पर्यटकको बिशेष खोजी कार्य गरिरहेको र उद्धार कार्य यथाशाक्य छिटो गर्न संयन्त्र परिचालन गरिरहेको जनाएको छ ।
सम्पर्कविहिन भएका पर्यटकको हेलिकोप्टरमार्फत उद्धार टोलीसहित खोजी कार्य भईरहेको मन्त्रालयले जनाएको छ ।
‘हराएका मानिस खोजी गर्ने विशेष यन्त्र रेक्को डिभाइसको समेत प्रयोग गरि खोजी कार्य भईरहेको छ । त्यस क्षेत्रमा ठूलो हिमपहिरो गएको र पहिरो गएको ठाउँ साँघुरो र जोखिमयुक्त भएकाले जमिनबाट खोजी गर्न कठिन भएको छ । हराएका पर्यटकको खोजी कार्य तथा उद्धार गर्न हामी कुनै कसर बाकीँ नराख्ने प्रतिबद्धता व्यक्त गर्दछौँ । साथै हराएका मानिसहरु छिट्टै नै हाम्रो सम्पर्कमा आउने विश्वास लिएका छौं’, विज्ञप्तिमा उल्लेख छ ।
अप्ठ्यारोमा परेका पर्यटकको उद्धार र खोजीमा सबै स्थानीयबासी, प्रशासन, पर्यटन क्षेत्रसँग सम्बन्धित संस्थाहरु लगायतलाई सक्रिय रुपमा लाग्न मन्त्रालयले आह्वान समेत गरेको छ ।

Leave a Reply

avatar
  Subscribe  
Notify of

Comment here